ჩეხეთის დედაქალაქის ცენტში, ვაცლავის მოედანზე, გაიმართა საქართველოს მოქალაქეთა საპროტესტო აქცია. პრაღის დემონსტრაციის მონაწილეთა თანახმად, აქციაში, რომელიც საქართველოს პარლამენტის მიერ „უცხოური გავლენის გამჭვირვალობის“ კანონის მიღების მიმართ პროტესტს წარმოადგენდა, 150-ზე მეტი ადამიანი მონაწილეობდა. მონაწილეებს ხელში ეჭირათ პლაკატები წარწერით: „კი ევროპას, არა რუსულ კანონს!“, „დაეხმარეთ საქართველოში დემოკრატიას!“. აქციის მონაწილეებმა შეასრულეს საქართველოს ჰიმნი. 1 მაისს საქართველოს პარლამენტმა მეორე მოსმენით მიიღო „უცხოური გავლენის გამჭვირვალობის“ კანონი. მისი ძალაში შესვლის შემთხვევაში, მედიასაშუალებები და არასამთავრობო ორგანიზაციები, რომლებიც დაფინანსების 20%-ზე მეტს უცხოეთიდან იღებენ, ვალდებული იქნებიან, რეგისტრაციაში გატარდნენ, როგორც „უცხოური ძალის ინტერესების გამტარებელი ორგანიზაცია“. три ტერმინი „უცხოური ძალა“ აიხსნება, როგორც „უცხო სახელმწიფო, უცხო ქვეყნის ფიზიკური ან იურიდიული პირი“. კანონის წინააღმდეგ საპროტესტო აქციები სახელწოდებით: „კი ევროპას! არა რუსულ კანონს“ თბილისში მესამე კვირაა, უწყვეტად მიმდინარეობს. საპოლიციო ძალები დემონსტრანტების წინააღმდეგ ხშირად იყენებენ წიწაკის სპრეის, წყლის ჭავლსა და ცრემლსადენ აირს. არაერთ შემთხვევაში სპეცრაზმელები ფიზიკურად გაუსწორდნენ დემონსტრანტებს. კანონის მიმართ საპროტესტო აქციები გაიმართა უცხოეთის არაერთ ქვეყანაში. ასევე ნახეთ რა „აურია“ ივანიშვილმა? ...